A ranar 13 ga Oktoba, 1943, gwamnatin Italiya ta ayyana yaƙi da Jamus, wadda a baya ƙawarta ce a ƙungiyar ƙasashen Axis. Daga nan, Italiya ta haɗa kai da ƙasashen Allies domin yaƙar Jamus a lokacin Yaƙin Duniya na Biyu.
Matakin ya biyo bayan hambarar da Benito Mussolini daga mulki a watan Yulin 1943 da kuma rushewar gwamnatin Fascist. Janar Pietro Badoglio ne ya karɓi ragamar mulkin Italiya, inda ya fara tattaunawa da ƙasashen Allies kan miƙa wuya.
A ranar 8 ga Satumba, 1943, Italiya ta sanar da miƙa wuya ga ƙasashen Allies, waɗanda suka fara sauka a yankin Salerno na kudancin ƙasar domin yaƙar sojojin Jamus.
Sai dai Jamus ta mayar da martani ta hanyar mamaye wasu sassan Italiya domin hana ƙasashen Allies amfani da ƙasar wajen kai farmaki kan yankunan da Jamus ta mamaye. Hakan ya tilasta wa Badoglio da iyalan gidan sarautar Italiya tserewa zuwa birnin Brindisi domin kafa sabuwar gwamnati.
A ranar 13 ga Oktoba, Badoglio ya ɗauki matakin haɗa sojojin Italiya da na Allies wajen yaƙar Jamus da kuma ƙoƙarin kwato birnin Rome. Wannan sauyin matsayi ya zama wani muhimmin mataki a tarihin Yaƙin Duniya na Biyu da kuma ƙoƙarin Italiya na rabuwa da mulkin Fascist.
