A ranar 6 ga Oktoba, 1981, aka kashe tsohon Shugaban ƙasar Masar, Anwar Sadat, a wani harin kwanton bauna da aka kai masa yayin wani bikin baje kolin sojoji a birnin Alkahira.
Anwar Sadat ya kasance shugaban Masar tun daga shekarar 1970, kuma ya shahara wajen ƙulla yarjejeniyar zaman lafiya da Isra’ila ta Camp David Accords a shekarar 1978.
Wannan mataki ya jawo masa suka daga wasu ƙungiyoyin masu tsattsauran ra’ayin Islama, waɗanda suka zarge shi da cin amanar muradun Larabawa.
Kafin kashe shi, a watan Satumba na 1981, Sadat ya kaddamar da samamen kama ’yan adawa da wasu masu fafutuka, inda aka tsare mutane sama da 1,500. Lamarin ya ƙara tsananta rashin jituwar da ke tsakaninsa da wasu ƙungiyoyin adawa.
A ranar 6 ga Oktoba, Sadat yana zaune a wajen bikin baje kolin sojoji domin tunawa da nasarar Masar a yakin 1973. Yana tare da manyan jami’an gwamnati da na soja, ciki har da mataimakinsa Hosni Mubarak.
Yayin da ake gudanar da faretin, wata motar soji ta tsaya kusa da wurin da Sadat yake zaune. Laftana Khalid al-Islambuli da wasu maharan suka fito daga motar, suka jefa gurneti sannan suka bude wa Sadat da sauran mutanen da ke wurin wuta.
An harbi Sadat sau da dama a yayin harin. An garzaya da shi zuwa asibitin soja, amma ya rasu bayan wasu sa’o’i sakamakon munanan raunukan da ya samu. Mutane 11 ne suka mutu a harin, yayin da wasu da dama suka jikkata.
Bayan mutuwar Sadat, mataimakinsa Hosni Mubarak ya gaje shi a matsayin shugaban ƙasar Masar. Daga baya aka kama Khalid al-Islambuli da wasu daga cikin wadanda suka shirya harin, kuma a shekarar 1982 aka kashe su bayan an same su da laifi.
Mutuwar Anwar Sadat ta zama ɗaya daga cikin manyan abubuwan da suka girgiza siyasar Masar da Gabas ta Tsakiya, tare da barin babban tarihi a dangantakar Masar da Isra’ila.
