Ɗan takarar shugaban ƙasa na jam’iyyar African Action Congress (AAC) a zaɓen 2027, Omoyele Sowore, ya buƙaci Majalisar Tarayya ta yi amfani da tanadin Sashe na 145(2) na Kundin Tsarin Mulkin Najeriya wajen bai wa Mataimakin Shugaban Ƙasa, Kashim Shettima, damar gudanar da ayyukan shugaban ƙasa a matsayin mukaddashi.
Sowore ya yi wannan kira ne a wani saƙo da ya wallafa a shafinsa na Facebook ranar Talata, 22 ga Satumba, 2026, inda ya ce cikar kwanaki 21 da Shugaba Bola Ahmed Tinubu ya shafe a wajen Najeriya ya kamata ya sa Majalisar Tarayya ta duba batun.
Tinubu ya bar Najeriya a ranar 30 ga Agusta domin hutun makonni uku.
Sai dai fadar shugaban ƙasa ta sanar a ranar 21 ga Satumba cewa ya tsawaita zamansa a ƙasashen waje da wasu ’yan kwanaki.
A cewar Sowore, Sashe na 145 na Kundin Tsarin Mulki ya tanadi cewa shugaban ƙasa zai aika da sanarwar rubutacciya ga Shugaban Majalisar Dattawa da Kakakin Majalisar Wakilai idan zai tafi hutu ko kuma ba zai iya gudanar da ayyukansa ba.
Ya yi iƙirarin cewa idan shugaban ƙasa ya gaza aika wannan sanarwa cikin kwanaki 21, Sashe na 145(2) ya bai wa Majalisar Tarayya damar amincewa, ta hanyar rinjayen ƙuri’u a kowace majalisa, da bai wa mataimakin shugaban ƙasa damar gudanar da ayyukan shugaban ƙasa a matsayin mukaddashi.
Sowore ya nemi Shugaban Majalisar Dattawa, Godswill Akpabio, da Kakakin Majalisar Wakilai, Tajudeen Abbas, su bayyana ko sun karɓi sanarwar da kundin tsarin mulkin ya tanada kafin Tinubu ya tafi.
Ya kuma soki bayanin fadar shugaban ƙasa na cewa Tinubu na gudanar da ayyukan gwamnati daga ƙasashen waje, yana mai cewa hakan bai warware tambayoyin da ya gabatar kan bin tanadin kundin tsarin mulki ba.
