Wani daga cikin mutanen da suka tsira daga lamarin mutuwar masu haƙar ma’adinai 37 a hannun hukumar NSCDC a Jihar Neja, ya yi zargin cewa jami’an hukumar sun fesa wani ruwa ko sinadari a cikin ɗakin da aka tsare su kafin a rufe su.
Ya ce an fara saka mutum 17 a wani ƙaramin ɗaki, kafin daga bisani aka ƙara wasu mutane, lamarin da ya jawo cunkoso da tsananin zafi. Ya ce bayan an fesa abin da bai san menene ba, mutanen da ke ɗakin suka fara tari da atishawa.
Mutane 67 ne aka kama a ranakun 15 da 16 ga Satumba bisa zargin haƙar ma’adinai ba bisa ka’ida ba, daga bisani 37 suka mutu a tsare. Har yanzu ba a tabbatar da ainihin musabbabin mutuwarsu ba, yayin da ake ci gaba da bincike.
Gwamnan Neja, Mohammed Umaru Bago, ya ce binciken lamarin ya zama dole domin gano gaskiyar abin da ya faru, yayin da gwamnatin tarayya ta dakatar da kwamandan NSCDC na jihar, Suberu Siyaka Aniviye, yayin da ake gudanar da bincike.
Shugaba Bola Ahmed Tinubu ma ya bayar da umarnin gudanar da cikakken bincike kan lamarin, tare da jaddada cewa duk wanda aka tabbatar da hannu wajen mutuwar waɗanda ke tsare zai fuskanci hukunci bisa doka.
