Gwamnatin tarayya ta fara shirin samar da wutar lantarki ta musamman da za ta rika samuwa na tsawon sa’o’i 24 a yankunan masana’antu a fadin Najeriya.
Ministan Masana’antu na Jiha, Sanata John Owan Enoh, ya bayyana hakan yayin bikin fara aikin samar da wuta ta megawatt 50 a yankin masana’antun Idu da ke Abuja.
Ya ce ingantacciyar wutar lantarki za ta taimaka wajen rage kudin samar da kayayyaki, bunƙasa masana’antun cikin gida da samar da karin ayyukan yi ga matasa.
Aikin zai fara da samar da megawatt 10 daga wani wuri kusa da bututun iskar gas na AKK a Zuba, sannan a isar da wutar zuwa Idu ta layin 33kV. Sauran megawatt 40 za a samar da su ne bayan an tsawaita bututun iskar gas zuwa yankin.
Ministan Wutar Lantarki, Joseph Tegbe, ya ce gwamnati na kuma duba hanyoyin samar da wutar lantarki kai tsaye ga masana’antu, tare da gudanar da binciken kayayyakin samar da wuta a manyan yankunan masana’antu.
Ya ce gwamnatin na da burin samarwa ko dawo da kusan ayyukan yi 180,000 a yankin masana’antun Lagos cikin watanni shida ta hanyar inganta samar da wutar lantarki.
