Gwamnan jihar Jigawa, Umar Namadi, ya kai ziyarar bazata zuwa sakatariyar gwamnatin jihar da safiyar Litinin, inda ya tarar da ofisoshin ma’aikatu da dama babu ma’aikata.
A wani faifan bidiyo da ya yaɗu a kafafen sada zumunta, an ga gwamnan yana zagayawa daga wannan ma’aikata zuwa wancan, inda ya tarar da ofisoshi da dama a kulle ko babu ma’aikata, sai wasu ’yan saƙo kaɗan.
Ziyarar ta zo ne a wani lokaci da ma’aikatan gwamnati ya kamata su kasance a wuraren aikinsu, lamarin da ya jawo ce-ce-ku-ce kan halartar ma’aikata a ofisoshin gwamnati.
Ana sa ran matakin gwamnan zai haifar da bincike kan halartar ma’aikata da kuma yadda ake gudanar da ayyuka a sakatariyar gwamnatin jihar.
Gwamnatin jihar ba ta bayyana matakin da za ta ɗauka kan ma’aikatan da aka tarar ba a lokacin da ake gabatar da wannan rahoto.
