Gwamnatin Sifaniya ta kwashe Falasdinawa 100 daga Zirin Gaza domin ba su kulawar lafiya a wasu asibitocin ƙasar, a wani mataki na jin kai ga waɗanda rikicin yankin ya shafa.
Rahotanni sun nuna cewa daga cikin mutanen da aka kwashe akwai yara 20 da ke buƙatar kulawar gaggawa saboda munanan raunuka da matsalolin lafiya.
Jami’an gwamnatin Sifaniya sun bayyana cewa matakin na daga cikin ƙoƙarin ƙasar na tallafa wa fararen hula da rikicin Gaza ya shafa, musamman waɗanda ba sa samun isasshen magani a yankin.
Gwamnatin ta kuma jaddada cewa za ta ci gaba da ba da gudunmawar jin kai tare da haɗin gwiwar ƙungiyoyin agaji na ƙasa da ƙasa domin taimaka wa waɗanda rikicin ya rutsa da su.
