Sanata mai wakiltar Kano ta Tsakiya, Rufai Sani Hanga, ya bayyana cewa a hasashensa, ɗan takarar jam’iyyar NDC, Peter Obi, ba zai samu nasarar lashe zaɓen shugaban ƙasa na shekarar 2027 ba.
Hanga ya bayyana hakan ne yayin wata hira da ya yi da Freedom Radio Kano, inda ya ce bisa yadda yake kallon yanayin siyasar Najeriya a halin yanzu, Peter Obi ba shi da isassun ƙuri’un da za su kai shi ga nasara a babban zaɓen shugaban ƙasa.
Ya kuma yi tsokaci kan tasirin wasu manyan ‘yan siyasa, inda ya ce sauya shekar Rabiu Musa Kwankwaso zuwa NDC ya sauya yanayin siyasa a wasu jihohi.
Sai dai ya yi ikirarin cewa har yanzu jam’iyyar ADC na da ƙarfin da za ta iya fafatawa a wasu yankuna na ƙasar.
Dangane da Atiku Abubakar, Hanga ya ce yana ganin tsohon mataimakin shugaban ƙasar na da damar samun goyon baya a wasu jihohin Arewa da kuma wasu sassan ƙasar idan ya tsaya takara.
Sanatan ya kuma yi iƙirarin cewa matsalolin tsaro da ƙalubalen tattalin arziki na iya yin tasiri ga zaɓen shekarar 2027.
Sai dai waɗannan ra’ayoyi nasa hasashe ne na siyasa, kuma sakamakon zaɓe zai dogara ne da abin da masu kaɗa ƙuri’a za su yanke a ranar zaɓe.
