Babbar Kotun Tarayya ta amince da bayar da belin tsohon Ministan Kimiyya da Fasaha, Uche Nnaji, bayan an gurfanar da shi kan wasu zarge-zarge da suka haɗa da amfani da takardar shaidar bogi da kuma laifukan da suka shafi cin hanci da rashawa.
Hukumar Yaƙi da Cin Hanci da Rashawa ICPC ce ta kai ƙarar gaban kotu, inda ta zargi tsohon ministan da aikata laifukan da suka saɓa wa doka.
Nnaji dai ya bayyana a gaban kotun domin fuskantar tuhume-tuhumen da ake yi masa.
Bayan sauraron buƙatar belinsa, alkalin kotun ya amince da sake shi bisa sharuɗɗa, inda ya sanya kuɗin beli na Naira miliyan 20 tare da wasu ƙa’idoji da ake buƙatar ya cika kafin ya samu ’yanci.
Kotun ta bayyana cewa dole ne wanda ake tuhuma ya bi dukkan sharuɗɗan belin kamar yadda aka gindaya, yayin da ake ci gaba da bin hanyoyin shari’a kan zarge-zargen da ake masa.
Ana sa ran za a ci gaba da sauraron shari’ar a ranar da kotu za ta sanya nan gaba, domin ci gaba da gabatar da hujjoji da sauraron ɓangarorin da ke ƙarar.
