Rundunar sojin Najeriya ta bayyana cewa dakarunta sun yi nasarar ceto mutum biyar da aka yi garkuwa da su a Kogi State, bayan da maharan suka tsere sakamakon matsin lamba daga hare-haren soji da ake ci gaba da kai wa.
A cewar rundunar, an gudanar da samamen ne a ranar 17 ga Yuni, 2026, yayin da ake ƙara ƙaimi wajen ragargaza maboyar ‘yan bindiga a cikin dazukan jihar.
Sojojin sun gudanar da bincike da sintiri daga yankin Oshokoshoko zuwa hanyar Adankolo, inda suka tarar da mutanen da aka sace bayan maharan sun yi watsi da su suka tsere.
Rahotanni sun nuna cewa an kubutar da mutanan ne bayan farmakin sama da ƙasa da ya tilasta wa masu garkuwa da mutane watsewa.
Daga bisani an kai waɗanda aka ceto wurin da ke da tsaro, sannan aka garzaya da su asibitin soji domin duba lafiyarsu.
Rundunar ta kuma ce tana ci gaba da tattara bayanan sirri daga waɗanda aka ceto domin gano sauran ‘yan ta’addan da ke da hannu, tare da tabbatar da ci gaba da matsin lamba har sai an kawar da dukkan maboyarsu.
