‘Yan bindiga sun yi garkuwa da mutane 15, galibinsu mata da yara ƙanana har da jarirai, a wani hari da suka kai da daddare a unguwar Sabon Layi da ke ƙaramar hukumar Bakori, a jihar Katsina.
Wata majiya daga al’ummar yankin ta bayyana jaridar Daily Trust cewa lamarin ya faru ne da misalin ƙarfe 9:45 na daren ranar Alhamis da ta gabata, lokacin da wasu ‘yan bindiga suka mamaye yankin tare da kai hari gidajen wani mutum mai suna Aliyu da kuma ƙanensa.
Wata majiya ta ƙara da cewa maharan sun gudanar da harin ne cikin tsari, inda suka kasu gida biyu domin cimma manufarsu.
Rahotanni sun nuna cewa wani ɓangare na ‘yan bindigar ya yi kama da masu satar shanu, yayin da ɗayan ɓangaren ya kutsa cikin al’umma tare da sace mutane da dama.
An kuma bayyana cewa duka ɓangarorin biyu sun tsere ta hanyoyi daban-daban ba tare da harbin bindiga ba, lamarin da ake zargin sun yi domin kauce wa jan hankali.
Majiyar ta ce kafin mazauna yankin su ankara cewa an sace shanunsu, lokaci ya kure musu wajen bin sawun maharan.
Sai daga baya ne aka gano cewa an kuma yi garkuwa da wasu daga cikin mazauna yankin.
An ce ‘yan bindigar sun tsere ne ta ƙauyen Mununu da ke maƙwabciyar ƙaramar hukumar Faskari, wata hanya da ake yawan amfani da ita daga ɓangarorin masu aikata laifi a yankin.
Haka kuma an ruwaito cewa jami’an tsaro na sa kai, ciki har da ‘yan kungiyar Community Watch Corps da kuma ‘yan banga, sun yi ƙoƙarin ceto waɗanda aka sace.
Sai dai ba su samu nasara ba, domin tuni maharan sun tsere.
Daga cikin waɗanda aka sace akwai yara ƙanana da dama, da jarirai.
Majiyoyi sun zargi cewa harin na iya kasancewa aikin wani fitaccen jagoran ‘yan bindiga mai suna Kwashen Garwa, wanda aka ce yana cikin waɗanda suka rattaba hannu kan yarjejeniyar sulhu da aka cimma watanni da suka gabata.
