Yankunan gabas da yamma na majalisun dokoki a Libya sun rattaba hannu kan yarjejeniya da za ta haɗa kashe kuɗin gwamnati gaba ɗaya, abin da Babban Bankin ƙasar ya bayyana a matsayin babban ci gaba.
Tun bayan rikicin da ya biyo bayan juyin juya halin Yankin kasashen Larabawa a shekarar 2011 wanda ya kifar da tsohon shugaban ƙasar Muammar Gaddafi, Libya ta kasa farfaɗowa gaba ɗaya, inda ta rabu gida biyu.
A halin yanzu, ƙasar na da gwamnatoci biyu, ɗaya a Tripoli karkashin Firaminista Abdulhamid Dbeibah da kuma wata a Benghazi da ke samun goyon bayan shugaban soji Khalifa Haftar.
Sabuwar yarjejeniyar kasafin kuɗin, wacce wakilan ɓangarorin biyu suka sanya hannu, ana sa ran za ta taimaka wajen inganta tsarin tafiyar da kuɗi da kuma kawo daidaito a harkokin tattalin arziki.
Duk da cewa Libya na samun kuɗaɗen mai masu yawa, ƙasar ta samu kimanin Dala biliyan 22 a bara, amma ƙasar har yanzu tana fuskantar gibin kuɗin waje na kusan dala biliyan 9, wanda ya sa aka rage darajar kuɗinta (dinar) a baya-bayan nan.
Babban Bankin Libya ya yaba da rawar da Amurka ta taka wajen sulhu, yana mai cewa wannan mataki zai taimaka wajen ƙarfafa tattalin arziki da haɗin kan ƙasar.
A nasa bangaren, Firaminista Dbeibah ya ce wannan yarjejeniya alama ce ta fata, amma ya jaddada cewa dole ne ɓangarorin su nuna cikakkiyar himma domin ganin an samu sakamako mai amfani ga rayuwar al’umma.
