Manoma a sassan Najeriya na ci gaba da bayyana damuwa kan karin farashin man fetur, suna gargadin cewa hakan na iya janyo tashin farashin abinci tare da rage yawan amfanin gona da ake samarwa.
Masu ruwa da tsaki a harkar noma sun ce karin farashin fetur na baya-bayan nan ya ƙara tsadar sufurin kayan aikin noma, gudanar da injunan ban ruwa, da kuma jigilar amfanin gona daga gonaki zuwa kasuwanni.
Wasu manoma sun ce lamarin ya sa noma ya zama mai tsada kuma mara riba fiye da da.Masana sun ce, rikicin da ke faruwa a Gabas ta Tsakiya ya taimaka wajen tashin farashin mai a kasuwar duniya, abin da ke shafar farashin man fetur a ƙasashe da dama ciki har da Najeriya.
Rikice-rikicen da ke faruwa a kasuwar makamashi ta duniya sun haifar da canjin farashin fetur tare da ƙara tsadar kayayyaki da ayyuka.
Masu noman sun yi gargadin cewa idan wannan yanayi ya ci gaba, yawan abinci na iya raguwa, domin wasu manoma na iya rage girman gonakinsu ko kuma jinkirta shuka saboda tsadar gudanar da noma. Haka kuma karin kudin sufuri na iya sa kai kayan abinci daga karkara zuwa birane ya kara tsada.
Masana tattalin arziki sun ce wannan na iya haifar da sabon tashin farashin abinci, wanda zai shafi miliyoyin ‘yan Najeriya da tuni suke kashe kaso mai yawa na kudin shigarsu wajen sayen abinci. Sun bukaci gwamnati da ta tallafa wa manoma ta hanyar rangwamen tallafi, inganta hanyoyin sufuri, da manufofin da za su rage tasirin karin farashin fetur a harkar noma.
Hukumomi sun ce suna sanya ido kan lamarin, domin tabbatar da cewa ‘yan kasuwa ba su yi amfani da karin farashin fetur wajen ƙara farashin kayayyaki da ayyuka ba tare da adalci ba.
