Gwamnatin Amurka ta gargaɗi ’yan ƙasarta da ke zaune a Najeriya, biyo bayan ƙara tsanantar rikici tsakanin Amurka da Iran.
A cikin wata sanarwa da aka fitar a ranar Litinin, hukumomin Amurka sun shawarci ’yan Amurkawa da ke ƙasashen waje da su kasance masu taka-tsantsan, sakamakon ci gaba da ayyukan soji da suka shafi Iran.
Sanarwar ta ce: “Bayan kaddamar da ayyukan sojin Amurka a Iran, ya kamata ’yan Amurka a sassa daban-daban na duniya, musamman a Gabas ta Tsakiya, su bi umarnin tsaro na baya-bayan nan da ofishin jakadanci ko karamin ofishin jakadancin Amurka mafi kusa ya fitar.”
Gargaɗin ya kuma nuna cewa ’yan Amurka na iya fuskantar tsaiko ko cikas wajen tafiye-tafiye, sakamakon rufe sararin samaniya lokaci zuwa lokaci, abin da ke da nasaba da rikicin da ke kara ta’azzara.
