Shugaban hukumar aikin hajji ta ƙasa (NAHCON), Farfesa Abdullahi Saleh Pakistan ya yi murabus.
Farfesa Abdullahi ya ajiye mukaminsa, a daidai lokacin da hukumar ke tsaka da shirye-shiryen gudanar da aikin Hajjin bana.
Jaridar Aminiya ta ruwaito cewa wani jami’i a cikin hukumar ya shaida cewa ajiye aikin na da nasaba da takardar korafi da Majalisar Kwamishinoni ta NAHCON ta aika wa Shugaban kasa Bola Ahmed Tinubu.
Takardar ta kunshi zarge-zargen aikata ba daidai ba a kansa.
Jami’in ya ce:
“Takardar korafin da aka aika wa Shugaban kasa ce ta sa aka bukace shi ya ajiye aiki. Kowa ya san cewa hukumar na fama da takaddama da rikice-rikice tun bayan nadinsa.”
Ya kara da cewa ana sa ran Fadar Shugaban kasa za ta fitar da sanarwa nan gaba domin bayyana sunan sabon shugaban hukumar.
