Majalisar Tarayyar Najeriya ta bayyana cewa za ta kada kuri’a game da batun kirkirar sababbin jihohi, kafa ’yan sandan jihohi da ba wa kananan hukumomi ‘yancin kai.
Haka kuma za a duba batun kebe kujeru na musamman ga mata, a yayin da ake kara duba yadda za a yi wa kundin tsarin mulkin Najeriya kwaskwarima.
Ben Kalu, wanda shi ne shugaban kwamitin sake duba kundin tsarin mulki, ya bukaci ‘yan majalisa su kasance cikin zaman da za a yi na sake nazarin kundin kafin fitar da matsaya.
Ya ce kwamitinsu ya kammala aikin da ya dace a wannan matakin, yayin da ake shirin daukaka batun zuwa mataki na gaba da ‘yan majalisa za su bayyana matsayarsu.
