Wasu da ake zargin ’yan daba ne sun kai hari kan magoya bayan jam’iyyar APC da ke kan hanyarsu ta zuwa ƙaddamar da yaƙin neman zaɓen Gwamnan Jihar Katsina, Malam Dikko Umaru Radda, na shekarar 2027.
Jaridar Daily Trust ta ruwaito cewa lamarin ya faru ne ranar Laraba, yayin da magoya bayan jam’iyyar ke tafiya daga Malumfashi zuwa Funtua, inda aka shirya gudanar da ƙaddamar da yaƙin neman zaɓen a shiyyar Sanatan Funtua.
Ɗaya daga cikin waɗanda abin ya shafa, Abubakar Lawal, ya ce wasu gungun mutane sun tare motocinsu, suka farfasa gilasan motocin da duwatsu da wasu abubuwa, tare da dukan fasinjojin.
Rahotanni sun nuna cewa mutane da dama sun jikkata, yayin da aka lalata motoci da dama sakamakon harin.
Waɗanda abin ya shafa sun yi kira ga hukumomi da su gudanar da bincike tare da hukunta duk wanda aka samu da hannu a lamarin. Sun kuma buƙaci a ƙarfafa tsaro domin hana sake aukuwar irin wannan tashin hankali yayin harkokin siyasa.
Duk da faruwar lamarin, Gwamna Dikko Umaru Radda ya ci gaba da shirin ƙaddamar da yaƙin neman zaɓensa kamar yadda aka tsara.
