Tsohon sanatan Kaduna ta Tsakiya, Shehu Sani, ya shawarci ’yan takarar da Hukumar Zaɓe Mai Zaman Kanta ta Ƙasa (INEC) ta cire sunayensu daga jerin ’yan takarar zaɓen 2027 da su guji ɓata kuɗi, lokaci da kuzari wajen shari’o’in da yake ganin ba za su yi nasara ba.
Shehu Sani ya bayyana cewa hukuncin Kotun Ƙoli da ya ba INEC damar cire sunayen wasu ’yan takara a bayyane yake, don haka ya kamata waɗanda abin ya shafa su fahimci halin da ake ciki maimakon ci gaba da kai ƙara kotu.
Haka kuma, ya yi kira ga lauyoyi, musamman manyan lauyoyin Najeriya (SANs), da su yi la’akari da halin da ’yan takarar ke ciki, maimakon ƙarfafa musu gwiwar shigar da sababbin ƙorafe-ƙorafe da za su sa su ci gaba da kashe kuɗi.
A cewarsa, wa’adin mulki na shekaru huɗu zai wuce, don haka ya kamata ’yan siyasar su mayar da hankali wajen tsara dabarun da za su taimaka musu a zaɓukan gaba.
Shehu Sani ya bayyana kalamansa ne a matsayin shawara ga ’yan siyasar da suka tsinci kansu a wannan hali, yana mai cewa ya fi dacewa su duba damar da za su samu a nan gaba maimakon ci gaba da fafatawa a kotu.
