Hukumar Kula da Wasanni ta Ƙasa (NSC) ta naɗa Dr Emmanuel Ikpeme a matsayin muƙaddashin Babban Sakataren Hukumar Kwallon Kafa ta Najeriya (NFF), biyo bayan sauye-sauyen shugabanci da suka faru a hukumar.
Ikpeme, wanda ya taɓa zama mataimakin babban sakataren NFF, zai jagoranci sakatariyar hukumar na ɗan lokaci, yayin da tsohon Daraktan Yaɗa Labarai, Dr Ademola Olajire, zai zama muƙaddashin mataimakin babban sakatare.
Naɗin ya biyo bayan murabus ɗin shugaban NFF, Ibrahim Musa Gusau, da babban sakatare Mohammed Sanusi, tare da wasu mambobin kwamitin zartarwa.
NSC ta kuma dakatar da shirye-shiryen gudanar da zaɓen shugabannin NFF da aka tsara yi ranar 27 ga Satumba, tana mai cewa za a fara sabon tsarin zaɓe bayan kammala gyare-gyaren da za a yi tare da FIFA da CAF.
Hukumar ta ce matakan wani ɓangare ne na shirin gyara tsarin gudanar da ƙwallon ƙafa a Najeriya, tare da tabbatar da cewa harkokin lig-lig ɗin ƙasar su ci gaba da gudana yadda ya kamata.
