Gwamnatin Jihar Zamfara ta ƙara ƙaimi wajen dakile sayarwa da tallace-tallacen magunguna ba bisa ka’ida ba, tana mai cewa lamarin na barazana ga lafiyar al’umma.
Kwamishiniyar Lafiya ta jihar, Dakta Nafisa Muhammad Maradun, ta bayyana hakan a wani taron masu ruwa da tsaki da aka gudanar a Gusau kan ƙarfafa dokoki da wayar da kan jama’a.
Ta ce sayen magungunan jabu ko marasa inganci na iya lalata ƙoƙarin gwamnati wajen inganta asibitoci da samar da ma’aikatan lafiya.
Kwamishiniyar ta yi gargadin cewa tallace-tallacen magunguna na iya jefa jama’a cikin amfani da magani ba daidai ba, musamman kuskuren ƙwaya, amfani da ƙwayoyin kashe ƙwayoyin cuta ba bisa ƙa’ida ba da kuma gazawar magani.
Ma’aikatar ta ce shirin zai haɗa da tsaurara sa ido kan hanyoyin rarraba magunguna, wayar da kan jama’a da kuma ɗaukar matakan doka kan masu karya ƙa’ida.
Daraktan Ayyukan Magunguna na jihar, Pharmacist Mas’ud Isah, ya buƙaci hukumomin kula da magunguna da jami’an tsaro da sauran masu ruwa da tsaki su ƙara musayar bayanan sirri domin gano masu sayar da magunguna ba bisa ka’ida ba.
Ya ce ya kamata a tabbatar da cewa masu izini da wuraren da aka amince da su ne kawai ke sayar da magunguna a jihar.
Masu ruwa da tsakin da suka halarci taron sun nuna goyon bayansu ga shirin, tare da yin kira da a gudanar da matakan tabbatar da doka cikin adalci ba tare da cutar da halastattun ’yan kasuwar magunguna ba.
