Bangaren tsohon mataimakin shugaban kasa, Atiku Abubakar, ya yi gargadi ga jam’iyyun adawa kan batun takaita tikitin takarar shugaban kasa na 2027 ga yankin Kudu kawai.
A wata sanarwa da mai ba Atiku shawara kan harkokin yada labarai, Olusola Sanni, ya fitar a Abuja, ya bayyana cewa irin wannan mataki na iya bai wa Shugaba Bola Ahmed Tinubu damar sake lashe zabe cikin sauki.
Sanarwar ta ce duk da cewa jam’iyyar APC na iya ci gaba da tsayar da dan takara daga Kudancin Najeriya tare da Tinubu, ya kamata jam’iyyun adawa su yi la’akari da yanayin siyasar kasar kafin daukar irin wannan matsaya.
Bangaren Atiku ya jaddada cewa dole ne jam’iyyun adawa su mayar da hankali wajen zaben dan takarar da zai iya kayar da APC maimakon duba yankin da ya fito kawai.
Haka kuma, sanarwar ta nuna cewa siyasar Najeriya na bukatar hadin kai da dabarun da za su bai wa adawa damar kalubalantar gwamnatin mai ci yadda ya kamata a zaben 2027.
