An tabbatar da cewa wasu da ake zargin ’yan fashin teku ne sun sace fasinjoji 15 a kan hanyoyin ruwa na Calabar a jihar Cross River.
Rahotanni sun bayyana cewa lamarin ya faru ne yayin da fasinjojin ke tafiya a jirgin ruwa daga Calabar zuwa Oron a jihar Akwa Ibom, inda wasu mahara dauke da makamai suka tare jirgin a tsakiyar ruwa suka kwashe su zuwa wani wuri da ba a sani ba.
Ana zargin cewa maharan sun yi amfani da karamin jirgin ruwa wajen kai harin, inda suka kwashe wasu daga cikin fasinjojin bayan sun tare su ta karfi. Har zuwa lokacin da ake hada wannan rahoto, ba a samu wani bayani game da inda aka kai wadanda aka sace ba, kuma ba a tabbatar da ko an tuntubi iyalansu domin neman kudin fansa ba.
Rahotanni sun kuma nuna cewa irin wadannan hare-haren na kara yawaita a yankunan ruwa na Calabar da kewaye, inda masu safarar jiragen ruwa da fasinjoji ke fuskantar barazana daga masu aikata laifukan.
Jami’an tsaro sun ce sun fara bincike tare da daukar matakan gaggawa domin ceto wadanda aka sace da kuma kamo wadanda suka aikata wannan danyen aiki.
