Kakakin Majalisar Dokokin Jihar Jigawa, Haruna Dangyatin, ya ce wajibi ne al’ummar jihar su zaɓi Shugaban Ƙasa Bola Ahmed Tinubu a zaɓen 2027.
Dangyatin ya bayyana hakan ne a ranar Asabar yayin ƙaddamar da kwamitin yaƙin neman zaɓen shugaban ƙasa da na gwamna na jam’iyyar APC a Dutse.
Ya bayyana goyon bayan Tinubu a matsayin wani nauyi na addini, bisa la’akari da cewa shugaban Musulmi ne, mataimakinsa ma Musulmi ne, sannan ya nuna goyon baya ga Arewa.
Kakakin majalisar ya kuma tuna rawar da Tinubu ya taka wajen taimakawa tsohon Shugaban Ƙasa Muhammadu Buhari ya samu nasarar zama shugaban ƙasa, yana mai cewa ya kamata Arewa ta rama wannan goyon baya.
Ya ce Tinubu ɗan’uwansu Musulmi ne kuma shugaba mai kishin Jihar Jigawa, yana mai cewa duk da cewa ba a saka jihar cikin jadawalin farko na ziyarar yaƙin neman zaɓensa ba, yanzu shugaban zai kai ziyara jihar.
Dangyatin ya bayyana kwarin gwiwarsa kan ƙarfin APC a Jigawa, bisa halartar tsoffin gwamnoni, sanatoci da ’yan majalisar tarayya a taron. Ya ce wannan ya nuna irin goyon bayan da jam’iyyar ke da shi a jihar.
Ya kuma bayyana cewa ƙungiyar City Boy Movement, wadda yake jagoranta a Jigawa, za ta ƙara ƙaimi wajen wayar da kan jama’a da neman goyon bayansu, ta hanyar ziyartar al’umma gida-gida domin bayyana ayyukan Tinubu da Gwamna Umar Namadi.
