Kwamitin Yaƙin Neman Zaɓen Shugaban Ƙasa na jam’iyyar ADC (ADC-PCC) ya musanta sahihancin wani jadawalin yaƙin neman zaɓe da ake yaɗawa, tana mai cewa takardar ba ta fito daga majalisar ko ofishinta na yaƙin neman zaɓe ba.
A cikin wata sanarwa da daraktan yaɗa labarai da hulɗa da jama’a na ADC-PCC, Kola Ologbondiyan, ya sanya wa hannu, majalisar ta bayyana cewa jadawalin ba shi da izini kuma bai kamata a ɗauke shi a matsayin jadawalin yaƙin neman zaɓen jam’iyyar na hukuma ba.
Sanarwar ta buƙaci ’yan Najeriya, mambobin ADC, shugabannin jam’iyyar da sauran masu ruwa da tsaki da su yi watsi da takardar da ake yaɗawa.
Haka kuma, majalisar ta shawarci mambobi da sauran masu ruwa da tsaki da su jira sanarwar hukuma daga ADC-PCC kan shirye-shiryen yaƙin neman zaɓe da jadawalinsa.
Matakin na zuwa ne bayan bayyanar jadawalin da ba a sanya wa hannu ba, wanda majalisar ta ce ba ta da masaniya a hukumance a kansa.
