Shugaban Amurka, Donald Trump, ya bayyana yiwuwar mayar da ’yan jarida zuwa wani wuri daban da ba zai dame shi sosai ba, a cewar wani saƙo da ya wallafa a kafar sada zumunta.
Wannan na zuwa ne bayan rahotannin da suka nuna cewa Trump ya taɓa tattauna yiwuwar mayar da tarukan manema labarai daga ɗakin taron manema labarai na James S. Brady da ke cikin Fadar Shugaban Ƙasar Amurka.
Sai dai, Trump ya musanta rahoton da ke cewa yana shirin mayar da ɗakin taron zuwa wurin iyo na cikin gida, inda ya ce bai taɓa tunanin yin hakan ba.
Batun ya sake jawo muhawara kan dangantakar gwamnatin Trump da kafafen yaɗa labarai, musamman game da damar da ’yan jarida ke da ita ta gudanar da aikinsu da ’yanci da kuma samun damar tambayar shugaban ƙasa kan manufofin gwamnatinsa.
