An zaɓi shugaban Ƙungiyar Masu Samar da kwakwar manja ta Najeriya (NPPAN), Ambasada Alphonsus Inyang, a matsayin shugaban Majalisar Ƙungiyar Masu Ƙaramin Ƙarfi a Noman Kwakwar Manja ta Duniya (WCOPS).
An zaɓe shi ne yayin babban taron ƙungiyar da aka gudanar a Gabashin Kalimantan, Indonesia, inda mahalarta sama da 400 daga sassa daban-daban na duniya suka halarta.
Ƙungiyar WCOPS na da manufar kare haƙƙoƙi da bunƙasa harkokin masu ƙaramin ƙarfi a noman kwakwar manja a faɗin duniya, waɗanda adadinsu ya haura miliyan 50.
Inyang, wanda kuma shi ne mataimakin shugaban ƙungiyar mai kula da Afirka da Gabas ta Tsakiya, an zaɓe shi tare da wasu shugabanni daga Indonesia, Malaysia, Honduras da sauran ƙasashe.
Ya yi alƙawarin wakiltar Afirka yadda ya kamata, tare da kare muradun masu noman kwakwar manja da ƙarfafa ci gaban masana’antar a duniya.
