Rundunar ’Yan Sandan Jihar Neja ta tabbatar da sace wasu mata manoma da ke aiki a gonar gyaɗa a ƙauyen Mukura, gundumar Kasuwan-Garba da ke ƙaramar hukumar Mariga.
Mai magana da yawun rundunar, Sufeto Wasi’u Abiodun, ya ce an samu rahoton cewa wasu ’yan bindiga sun yi garkuwa da fiye da mutane 20 a yankin ranar 27 ga Satumba da misalin ƙarfe 3 na rana.
Sai dai Shugaban Ƙaramar Hukumar Mariga, Aliyu Muhammadu, ya ce adadin mutanen da aka sace ya kai 47, kuma dukkansu mata ne da ke aikin gona. Ya ƙara da cewa ɗaya daga cikin matan ta haihu ne yayin da take hannun masu garkuwar.
A cewar shugaban ƙaramar hukumar, masu garkuwar sun tuntubi iyalan waɗanda aka sace, inda suka buƙaci Naira miliyan biyu kan kowacce mace a matsayin kuɗin fansa.
Rundunar ’yan sanda ta ce jami’an tsaro na haɗin gwiwa suna ci gaba da ƙoƙarin gano inda waɗanda aka sace suke tare da ceto su.
