Hukumar Zaɓe ta Ƙasa (INEC) ta sanya ranar Asabar, 19 ga Satumba, 2026, domin gudanar da zaɓen cike gurbin kujerar Dawakin Kudu a Majalisar Dokokin Jihar Kano, tare da wasu kujerun majalisu huɗu da suka zama babu a faɗin Najeriya.
Hukumar ta bayyana jadawalin zaɓen ne a wata sanarwa da ta wallafa a shafinta na X a ranar Juma’a.
Ta tabbatar da cewa za a gudanar da kaɗa ƙuri’a a rumfunan zaɓen da aka ware daga 8:30 na safe zuwa 2:30 na rana.
Za a gudanar da zaben ne bayan tsohon ɗan majalisar da ke wakiltar Dawakin Kudu, Rabiu Shuaibu, ya koma Majalisar Wakilai ta Tarayya.
Shuaibu, wanda a baya ya wakilci Dawakin Kudu a Majalisar Dokokin Jihar Kano, ya tsaya takara a zaɓen cike gurbin kujerar Dawakin Kudu/Warawa ta Majalisar Wakilai da aka gudanar a watan Yuni, inda ya yi nasara a ƙarƙashin jam’iyyar APC.
An zaɓe shi ne domin cike kujerar da ta zama babu bayan rasuwar tsohon ɗan majalisar, Muhammad Danjuma-Hassan.
Bayan nasarar Shuaibu da komawarsa Majalisar Wakilai, kujerar Dawakin Kudu a Majalisar Dokokin Jihar Kano ta zama babu kowa a kanta, lamarin da ya sanya aka shirya gudanar da zaɓen cike gurbin a ranar 19 ga Satumba.
Baya ga Kano, INEC ta ce za a gudanar da zaɓen cike gurbin wasu kujerun majalisa a jihohin Gombe, Bauchi da Delta.
A Jihar Gombe, za a gudanar da zaɓen kujerar Gombe/Kwami/Funakaye ta Majalisar Wakilai, wadda ta zama babu kowa a kai bayan rasuwar ɗan majalisa Yaya Bauchi Tongo a watan Yuni 2026.
A Jihar Bauchi, akwai kujerun Sakwa da Disina na Majalisar Dokokin Jihar. Kujerar Sakwa ta zama babu wakilci bayan rasuwar ɗan majalisar da ke kai, yayin da ta Disina ta zama babu wakilci bayan ɗan majalisar ya yi murabus domin neman kujerar shugabancin ƙaramar hukuma.
A Jihar Delta, za a gudanar da zaɓen kujerar Udu ta Majalisar Dokokin Jihar, wadda majalisar ta ayyana a matsayin babu bayan wakilinta, Collins Egbetamah, ya fice daga APC ya koma NDC.
INEC ta ce:
“Za a gudanar da kaɗa ƙuri’a a rumfunan zaɓe da ke cikin mazabun da abin ya shafa daga ƙarfe 8:30 na safe, kuma za a rufe da ƙarfe 2:30 na rana.”
Hukumar ta ƙara da cewa shirye-shiryen gudanar da zaɓen na ci gaba, ciki har da tura bayanan wakilan jam’iyyu ta hanyar na’ura da kuma tantance masu sa ido kan zaɓe, domin tabbatar da ingantaccen shiri da gudanar da harkokin zaɓe a dukkan mazabu biyar a ranar zaɓe.
