Sabon Ministan Lantarki, Joseph Olasunkanmi Tegbe, ya bayyana shirin gwamnatin tarayya na daukar tsauraran matakai kan kamfanonin samar da rarraba wutar lantarki da ba sa gudanar da ayyukansu yadda ya kamata.
Ministan ya bayyana hakan ne yayin da yake gabatar da tsare-tsarensa a wani taro na NESG da aka gudanar a ranar 19 ga Agusta 2026.
Tegbe ya ce ma’aikatar za ta samar da tsarin tantance aikin kamfanonin samar da wuta (GenCos) da na rarraba wutar lantarki (DisCos), inda wadanda suka yi kokari za su samu lada, yayin da wadanda suka gaza za su fuskanci hukunci.
A cewarsa, manufar matakin ita ce inganta ayyukan kamfanonin, kara yawan wutar da ake samu ga jama’a da kuma kare masu amfani da wutar lantarki daga rashin ingantaccen aiki.
Ministan ya kuma bayyana cewa akwai bukatar sake duba tsarin farashin wutar lantarki domin samar da yanayin da zai taimaka wajen farfado da masana’antu da kuma jawo karin jarin masu zaman kansu.
Ya ce Najeriya na da damar samar da megawatt 13,625, amma adadin da ake iya rarrabawa ya yi kasa sosai, lamarin da ya nuna akwai babban gibi tsakanin samar da wuta da rarraba ta.
Ministan ya ce matsalar ta sanya gidaje da ‘yan kasuwa da dama neman hanyoyin samar da wutar kansu.
Ya bayyana cewa ‘yan Najeriya sun kashe makudan kudade wajen samar da wutar kansu, duk da cewa abin da ake samu daga tsarin wutar lantarki na kasa bai kai wannan adadi ba.
Gwamnatin tarayya ta kuma ce za ta mayar da hankali wajen karfafa manyan hanyoyin wutar lantarki da suka hada da layin Lagos, Enugu-Port Harcourt da Abuja-Kaduna-Kano.
Manufar sabon tsarin ita ce inganta samar da wutar lantarki, rarrabawa da kuma tabbatar da cewa masu amfani da wuta da masana’antu sun samu ingantaccen sabis.
