Kwamitin yaƙin neman zaɓen Gwamnan Osun, Ademola Adeleke, ya zargi hukumar INEC da shirin ayyana zaɓen gwamnan jihar da aka gudanar a matsayin wanda bai kammala ba.
A cikin wata sanarwa da shugaban kwamitin yaɗa labarai na Imole Campaign Council, Bamidele Salam, ya fitar, ya ce ana zargin shirin na da nufin dakile nasarar Adeleke, wanda ke takara a ƙarƙashin jam’iyyar Accord.
Salam ya ce shirin na samun goyon bayan wasu gwamnonin APC da shugabannin jam’iyyar, yana mai cewa hakan zai kasance ƙoƙarin sauya abin da al’ummar Osun suka zaɓa.
Ya buƙaci INEC ta tabbatar da cewa an gudanar da zaɓen cikin gaskiya da adalci, tare da yin kira ga hukumomin tsaro da su ƙara tsaro a cibiyoyin tattara sakamako.
Kwamitin ya kuma zargi wasu ’yan daba da yin garkuwa da akwatunan zaɓe a wasu rumfunan zaɓe, inda ya buƙaci a cafke waɗanda ake zargi da hannu a lamarin.
Ya kuma yi kira ga masu sa ido na cikin gida da na ƙasashen waje da su sanya ido kan yadda ake tattara sakamakon zaɓen tare da yin magana idan aka samu wani yunƙuri na karkatar da sakamakon.
