Shugaban Kasa Bola Ahmed Tinubu ya bayyana cewa gwamnatin tarayya ba za ta nuna wani sassauci ga duk wanda aka samu da hannu wajen tallafawa ayyukan ta’addanci ta hanyar samar da kudade ko wasu hanyoyin taimako ba.
Tinubu ya ce yaki da ta’addanci da sauran manyan laifuffuka na daga cikin manyan manufofin gwamnatinsa, yana mai jaddada cewa duk masu hannu a irin wadannan ayyuka za su fuskanci hukunci kamar yadda doka ta tanada.
Shugaban kasar ya bayyana cewa jami’an tsaro da hukumomin yaki da masu aikata laifukan hada-hadar kudade suna ci gaba da bibiyar mutanen da ake zargi da samar wa kungiyoyin ta’addanci kudade ko wasu nau’o’in tallafi.
Ya kara da cewa gwamnati za ta ci gaba da hada gwiwa da kasashen duniya da kungiyoyin kasa da kasa domin dakile hanyoyin da masu aikata ta’addanci ke amfani da su wajen samun kudade da gudanar da ayyukansu.
Tinubu ya jaddada cewa tabbatar da zaman lafiya da tsaro a fadin Najeriya na bukatar hadin kan gwamnati, hukumomin tsaro da kuma al’umma baki daya.
Ya yi kira ga ‘yan kasa da su rika bai wa hukumomi sahihan bayanai kan duk wani motsi ko alamar da za ta iya taimakawa wajen dakile ayyukan ta’addanci da sauran laifuffuka.
Shugaban kasar ya tabbatar da cewa gwamnatin tarayya za ta ci gaba da daukar matakan da suka dace domin kare rayuka da dukiyoyin al’ummar Najeriya tare da tabbatar da cewa masu hannu a ayyukan ta’addanci ba su tsira daga hukunci ba.
