Ma’aikatar Shari’ar Amurka ta fuskanci gagarumar raguwar ma’aikatan shari’a tsakanin farkon shekarar 2025 zuwa watan Janairun 2026, inda sama da kashi ɗaya cikin huɗu na lauyoyinta suka bar aiki.
Rahotanni sun nuna cewa jimillar lauyoyi 3,402 ne suka yi murabus ko aka sallame su a wannan lokaci, yayin da sabbin ma’aikatan da aka ɗauka aiki suka kai 771 kacal, lamarin da ya janyo raguwar yawan lauyoyin ma’aikatar idan aka kwatanta da ƙarshen shekarar 2024.
Jaridar Financial Times ta ruwaito cewa sauye-sauyen na da alaƙa da matakan sake fasalin gwamnati da kuma cire wasu jami’ai masu alaƙa da tsofaffin shari’o’i yayin da gwamnati ke sauya manufofinta.
Wasu jami’ai sun bayyana cewa raguwar ma’aikatan na iya shafar yadda ma’aikatar ke gudanar da ayyukanta, musamman a lokacin da take fama da tarin shari’o’i da kuma ayyukan tabbatar da doka da oda a fadin ƙasar.
