Gwamnan jihar Kano, Abba Kabir Yusuf, ya miƙa fom ɗinsa na takarar gwamna domin zaɓen shekarar 2027 ga kwamitin gudanarwa na ƙasa na jam’iyyar APC.
Hakan na ƙunshe ne cikin wata sanarwa da mai magana da yawun gwamnan, Sunusi Bature Dawakin Tofa, ya fitar.
Gwamnan ya je tare da sanata Ibrahim Shekarau, mataimakin shugaban majalisar dattawa Barau Jibrin, Kawu Sumaila, mambobin majalisar wakilai da sauran manyan mutane daga jihar.
Da yake zantawa da manema labarai bayan miƙa fom ɗin, Gwamna Yusuf ya bayyana neman wa’adi na biyu a matsayin sabon kira ga hidima da kuma sabunta alƙawarin yi wa al’ummar Kano aiki.
Ya ce gwamnatinsa za ta faɗaɗa ayyukan bunƙasa birane a faɗin jihar, yayin da za a ƙara mai da hankali kan gina tituna, faɗaɗa magudanan ruwa da kuma sabunta kasuwanni.
Gwamnan ya ce bunƙasa yankunan karkara zai ci gaba da kasancewa babban abin da gwamnatinsa za ta fi bai wa muhimmanci. Ya yi alƙawarin ƙarin zuba jari wajen gyaran hanyoyin karkara, samar da ruwa, cibiyoyin lafiya da makarantu.
Haka kuma ya yi alƙawarin ƙara tallafa wa harkar noma da shirye-shiryen tallafa wa matasa da manoma, yana mai cewa samar da ayyukan yi da bunƙasa matasa za su ci gaba da kasancewa cikin manufofin gwamnatinsa.
Gwamna Yusuf ya sake jaddada aniyarsa ta inganta harkokin ilimi da kiwon lafiya a jihar Kano.
Ya ce haɗin kai, zaman lafiya da shugabanci mai haɗa kowa suna daga cikin manyan ginshiƙan gwamnatinsa.
Ya ƙara da cewa zai ci gaba da aiki tare da masu ruwa da tsaki domin ci gaban jihar Kano.
Har ila yau, ya tabbatar da goyon bayansa ga manufofin “Renewed Hope Agenda” domin jawo ƙarin ayyukan gwamnatin tarayya da damammaki zuwa Kano.
Gwamnan ya gode wa al’ummar Kano bisa ci gaba da goyon baya da amincewar da suke nuna masa, tare da tabbatar musu da ƙarin jajircewa, shugabanci na gaskiya da ci gaban da ya shafi jama’a kai tsaye.
