Wani ma’aikaci a fadar shugaban ƙasa, mai suna Zekari Umoru, ya bayyana a kotu cewa abokan aikinsa ne suka yaudare shi cikin zargin shirin juyin mulki da ake tuhumarsu da shi.
Umoru, wanda yana cikin waɗanda ake shari’a a kansu su shida, ya ce bai san cikakken abin da ke faruwa ba a farko, domin ya ɗauki wani daga cikin waɗanda ake zargi, mai suna Ma’aji, a matsayin ɗan kasuwa ne kawai.
Ya bayyana cewa ya fara amincewa da shi ne bayan ganin wasu kuɗaɗe da ake tura masa suna ɗauke da sunan Ma’aji, lamarin da ya sa bai yi zargin komai ba.
A cewarsa, akwai lokuta da dama da suka haɗu a wani wuri da ake kira “Tiger Bar”, inda aka ba shi kuɗi tsakanin naira 100,000 zuwa 120,000.
Sai dai ya ce daga baya ne ya fahimci cewa abubuwan da suke yi suna da alaƙa da wata manufa da bai kamata ba, inda ya bayyana cewa an yaudare shi kuma bai san gaskiyar shirin ba tun farko.
Shari’ar na ci gaba da gudana a kotu, yayin da hukumomi ke ci gaba da bincike kan zargin yunkurin juyin mulki da ake yi wa waɗanda ake tuhuma.
