Wani makusanci ga tsohon gwamnan Jihar Kaduna, Nasir Ahmad El-Rufai, ya bayyana yadda ya shafe lokacinsa a tsare, inda ya ce ya mayar da hankali kan azumi, ibada da karatu.
Mutumin, mai suna Bashir Garba Sufyan, ya ce bayan sakinsa, El-Rufai ya koma gida tare da iyalansa da abokansa. Ya ƙara da cewa El-Rufai ya gaya musu cewa tun lokacin da aka tsare shi yana azumi, ya kuma kammala karatun Alƙur’ani gaba ɗaya, ya karanta littattafai 10, har ma ya rubuta wasu.
An dai ruwaito cewa hukumar ICPC ta sako El-Rufai bayan tsare shi tun ranar 19 ga Fabrairu, 2026. Tun kafin hakan, ya kuma yi kwanaki biyu a hannun EFCC domin tambayoyi.
Hukumar ICPC ta gurfanar da shi a gaban kotu bisa tuhume-tuhume guda 10 da suka shafi zargin karkatar da kadarorin gwamnati da kuma wasu laifukan, amma ya musanta dukkan zarge-zargen. Kotu ta ɗage sauraron bukatar belinsa zuwa ranar 31 ga Maris.
Sai dai, bayan rasuwar mahaifiyarsa a birnin Cairo na ƙasar Masar, hukumar ta sake shi, kamar yadda ɗansa Bashir El-Rufai ya tabbatar.
A halin yanzu, Bola Ahmed Tinubu, gwamnan Kaduna Uba Sani da kuma Nuhu Ribadu sun miƙa ta’aziyyarsu ga El-Rufai, yayin da lamarin ya jawo muhawara a kafafen sada zumunta.
