Ƙungiyar kare haƙƙin Musulmi ta Muslim Rights Concern (MURIC) ta bukaci Ministan Tsaron Najeriya, Janar Christopher Musa mai ritaya, ya kawo gagarumin sauyi a harkar tsaro ko kuma ya yi murabus daga mukaminsa.
MURIC ta ba Ministan wa’adin kwanaki 14 domin ya nuna sauye-sauye masu ma’ana wajen inganta tsaro a Jihar Sokoto da yankunan da ke kewaye da ita.
Ƙungiyar ta bayyana matsayinta ne a cikin wata sanarwa da Daraktan Zartarwarta, Farfesa Ishaq Akintola, ya fitar ranar Asabar, 22 ga Agusta, 2026.
A cewar MURIC, aƙalla mutane 43, ciki har da wani limami, an kashe a Jihar Sokoto cikin makonni uku, yayin da wasu mutane 19 kuma aka yi garkuwa da su a cikin wannan lokaci.
Ƙungiyar ta ce waɗanda hare-haren suka rutsa da su Musulmai ne, tana mai bayyana lamarin a matsayin babbar barazana ga al’ummar Musulmi da kuma matsayin Sokoto a matsayin muhimmiyar cibiyar addinin Musulunci a Najeriya.
Akintola ya ce idan Abuja ita ce cibiyar siyasar Najeriya, yayin da Legas take matsayin cibiyar tattalin arziki, to Sokoto ita ce zuciyar Musulunci a ƙasar.
Ya ce saboda muhimmancin jihar ga Musulman Najeriya, duk wani hari da ake kai wa Sokoto na haifar da fargaba da damuwa a tsakanin al’ummar Musulmi.
MURIC ta zargi Rundunar Sojin Najeriya da gazawar kare al’ummar jihar, tare da neman gwamnati ta samar da wani ingantaccen tsarin tsaro da zai kare Sokoto da sauran yankunan da ke kusa da ita.
Ƙungiyar ta kuma yi nuni da wani gargadi da Hukumar Tsaro ta Farin Kaya (DSS) ta bayar kan yiwuwar kai hare-hare ga manyan makarantun jihar Sokoto, tana mai cewa wannan gargadi ya ƙara nuna bukatar ɗaukar matakin gaggawa.
MURIC ta ce Ministan Tsaro ya gaza cika alkawarin da ya yi na kawo ƙarshen kashe-kashe da matsalar tsaro a ƙasar.
Ƙungiyar ta tuna da kalaman da Christopher Musa ya yi lokacin da ya fara aiki, inda ya bayyana cewa ba zai so ya gaza wa kansa, ƙasarsa da iyalinsa ba.
Sai dai MURIC ta ce halin da ake ciki a yanzu ya nuna cewa har yanzu akwai manyan ƙalubale a fannin tsaro, musamman a wasu sassan Arewa maso Yamma.
Wa’adin kwanaki 14 da MURIC ta bayar zai fara ne daga Litinin, 24 ga Agusta, 2026. Ƙungiyar ta ce tana son ganin sauye-sauye bayyanannu kuma masu iya tabbatarwa a tsarin tsaron Sokoto kafin wa’adin ya cika.
Ta kuma bukaci a mayar da birnin Sokoto cikin wuraren da ke da matuƙar wahalar kutsawa ko kai hari, tare da tabbatar da cewa babu wata barazana da za ta iya kusantar muhimman wurare kamar fadar Sarkin Musulmi.
MURIC ta ce idan Ministan Tsaron ya gaza cika waɗannan buƙatu cikin wa’adin da aka ba shi, ya kamata ya gabatar da takardar murabus ɗinsa.
