An sace fitulun titi masu amfani da hasken rana guda 168 da aka girka a yankin Longbridge da ke kan babbar hanyar Lagos-Ibadan, lamarin da ya sake haifar da damuwa kan tsaron masu ababen hawa da ke amfani da hanyar da dare.
Rahotanni sun nuna cewa an girka fitulun ne a shekarar 2025 domin samar da haske a kan wani sashe mai tsawon kusan kilomita biyar, tare da inganta tsaron masu ababen hawa.
Sai dai fitulun sun fara ɓacewa sannu a hankali watanni kaɗan bayan girka su.
An gano cewa wasu daga cikin sandunan fitulun an kwance su a hankali, yayin da wasu kuma aka cire su da ƙarfi.
Ana zargin ɓarnar ta gudana ne a matakai daban-daban.
Masu ababen hawa da ’yan kasuwa a yankin sun nuna damuwa, suna cewa komawar wasu sassan hanyar cikin duhu na iya ƙara haɗarin haɗurra da kuma kai hare-hare kan masu ababen hawa, musamman waɗanda motocinsu suka samu matsala a kan hanyar da dare.
Jami’an gwamnati sun tabbatar da faruwar satar, inda aka bayyana cewa an kama wasu da ake zargi da aikata ɓarnar tare da gurfanar da su a gaban kotu.
Haka kuma, ana shirin ɗaukar wasu matakai domin hana sake faruwar lamarin.
