Tsohon gwamnan Jihar Kaduna, Nasir El-Rufai, ya bayyana damuwarsa kan abin da ya kira wani sabon shiri na haɗa shi da aikata laifuka, yana zargin cewa akwai wani tsari na ɓoye da ake yi domin ɓata masa suna da kuma tsawaita tsare shi a kurkuku.
A wata sanarwa da mai ba shi shawara kan harkokin yaɗa labarai, Muyiwa Adekeye, ya fitar, El-Rufai ya yi gargadin cewa ana masa “mugun shiri”, yana mai nuni da wasu abubuwan da suka faru kwanan nan da ya ce suna nuna wata barazana mai tsanani.
Ya tuno da wani lamari da ya faru a ranar 12 ga Fabrairu, 2026, inda aka yi ƙoƙarin kama shi a filin jirgin sama na Abuja bayan dawowarsa daga Cairo, yana mai cewa wannan shi ne farkon irin ƙalubalen da yake fuskanta.
Haka kuma ya bayyana cewa ya amsa gayyatar EFCC a ranar 16 ga Fabrairu, inda aka tsare shi, sannan daga bisani aka miƙa shi ga ICPC a ranar 18 ga Fabrairu.
Sabuwar damuwar tasa ta taso ne daga wani rahoto da jaridar The Nation ta wallafa a ranar 18 ga Afrilu, wanda ya ce wasu ‘yan bindiga sun kai hari gidan wani shaida a kotu. Shaidan, Mohammed Umar Karage, ya danganta harin da rawar da yake takawa a shari’ar, yana kuma kwatanta lamarin da ɓacewar wani ɗan gwagwarmaya a Kaduna, Abubakar Idris Dadiyata.
Sai dai bangaren El-Rufai ya ƙaryata zargin, yana cewa an ƙirƙiro labarin ne domin ɓata masa suna da hana a ba shi beli. Ya ce shi mutum ne mai bin doka, kuma ba shi da alaƙa da wannan lamari.
Ya kuma bayyana cewa lauyoyinsa sun fara shirye-shiryen shigar da ƙara kan ɓata suna a kan jaridar.
Sanarwar ta ƙara da cewa tun daga shekarar 2023, ake yaɗa masa maganganu marasa tushe domin ɓata masa suna, duk da irin gudunmawar da ya bayar ga ƙasa.
Ya kuma yi kira da a mutunta doka da ‘yancin ɗan ƙasa, yana gargadin cewa kada a mayar da tsarin shari’a hanyar zalunci.
