Ƙungiyoyin fararen hula (CSOs) sun bukaci INEC ta tabbatar da ingancin dandalin IReV a babban zaɓen 2027, tare da ƙara wayar da kan matasa domin ƙarfafa amincewarsu da tsarin zaɓe.
Sun bayyana hakan ne a taron tattaunawa kan shigar matasa cikin harkokin zaɓe da ƙungiyar Kimpact Development Initiative (KDI) ta shirya a Abuja. Sun ce duk da nasarar IReV a zaɓukan Ekiti da Osun na 2026, akwai bukatar tabbatar da ingancinsa a 2027.
Sun ce matsalar karɓar katin zaɓe na PVC ita ce babbar ƙorafin matasa, sai matsalolin rajista da sayen ƙuri’u. Rahotanni 656 da matasa 220 suka tattara sun nuna cewa 152 sun shafi karɓar PVC, yayin da 79 suka shafi rajistar masu zaɓe.
Haka kuma, sun bayyana cewa kashi 95.4 cikin 100 na rahotannin da aka samu daga jihar Sokoto sun shafi matsalar karɓar PVC. Sun bukaci gwamnati ta samar wa INEC isassun kuɗaɗe a kan lokaci, tare da mayar da wayar da kan masu zaɓe aiki na shekara-shekara.
Masu ruwa da tsakin sun kuma bukaci INEC, NOA da ƙungiyoyin fararen hula su haɗa kai wajen wayar da kan matasa. Sun yi kira ga jami’an tsaro su kare masu zaɓe daga tashin hankali, yayin da suka bukaci matasa su shiga zaɓe tare da kare ƙuri’unsu.
