Wasu jami’an Amurka sun ce bayanan hotunan tauraron ɗan adam da wasu bayanan leƙen asiri da ƙungiyoyin China suka samar sun taimaka wa Iran wajen inganta iya gano wuraren sojojin Amurka da kuma kai hare-hare masu ƙarin daidaito a Gabas ta Tsakiya.
Rahotannin sun ce irin waɗannan bayanai sun taimaka wa Iran wajen kai hari kan wani sansanin sojin Amurka da ke Jordan a watan Yuli, inda aka kashe sojojin Amurka uku.
Jami’an Amurka sun danganta ingancin harin da bayanan hotunan tauraron ɗan adam da aka samu daga ƙungiyoyin China.
Haka kuma, jami’an sun ce bayanan ƙasa da sararin samaniya daga China sun ƙara wa Iran damar bibiyar jiragen ruwa da ke ratsa mashigar tekun Hormuz.
Ana zargin bayanan sun taimaka wajen sanin lokacin da ya fi dacewa Iran ta yi amfani da jirage marasa matuƙa wajen barazana ko kai hari kan wasu jiragen ruwa.
Sai dai rahotannin sun nuna cewa har yanzu ba a tabbatar da irin rawar da gwamnatin China kai tsaye ke takawa wajen wannan taimakon ba.
Wasu bayanai sun ce China ta musanta hannu wajen samar da irin wannan tallafin, yayin da jami’an Amurka ke ci gaba da binciken yadda ƙungiyoyin China suka samar da bayanan da suka isa hannun Iran.
A cewar rahotannin, mashigar Hormuz na daga cikin muhimman wuraren da Iran ke amfani da su wajen matsa wa Amurka da kuma yin barazana ga jigilar kayayyaki da man fetur. Hakan ya ƙara sanya batun bayanan leƙen asiri daga China cikin muhimman abubuwan da ake tattaunawa a rikicin Iran da Amurka.
