Mata mahajjata biyu daga jihar Sokoto sun rasu a birnin Makka na ƙasar Saudiyya bayan kammala aikin Hajjin shekarar 2026.
Mataimakin Amirul Hajj kuma Babban Alƙalin jihar Sokoto, Alhaji Sodangi Acida, ne ya bayyana hakan a wata sanarwa da shugaban sashen yaɗa labarai da hulɗa da jama’a na Hukumar Jin Daɗin Alhazan Jihar Sokoto, Faruku Umar, ya fitar.
Mamatan sun haɗa da Ladi Umar daga ƙaramar hukumar Bodinga da kuma Hadiza Umar daga ƙaramar hukumar Yabo.
Alhaji Acida ya ce wasu mata mahajjata biyu da hatsarin ya rutsa da su tare da mamatan suna ci gaba da karɓar magani a wani asibiti da ke Saudiyya.
Ya bayyana cewa ɗaya daga cikinsu na jinyar karayar ƙashi, yayin da ɗayar ke samun kulawa sakamakon cirewar ƙashin hannu daga maɓuɓɓugarsa.
Ya miƙa ta’aziyyar gwamnatin jihar Sokoto ga iyalan mamatan, tare da addu’ar Allah SWT Ya gafarta musu kura-kuransu kuma Ya sanya su a Aljannatul Firdausi.
Game da dawowar alhazai gida, Mataimakin Amirul Hajj ya ce ana sa ran rukunin farko na alhazan Sokoto zai tashi daga Saudiyya zuwa Najeriya a ranar 14 ga watan Yuni.
Ya ƙara da cewa za a gudanar da jigilar alhazai bisa tsarin “wanda ya fara zuwa, shi zai fara komawa.”
Haka kuma, ya buƙaci alhazai su bi ƙa’idojin kaya da aka tanada, yana mai jaddada cewa nauyin kayan kowane mahajjaci bai kamata ya wuce kilo 32 ba.
