Ma’aikatan Sinawa da ’yan Najeriya da ke aiki a aikin gina layin dogo na Kano-Maradi sun gudanar da wani biki na musamman domin bikin Mid-Autumn Festival, inda suka yi amfani da wannan dama wajen musayar al’adu da ƙarfafa zumunci a tsakanin ma’aikatan ƙasashen biyu.
A yayin bikin, ma’aikatan Sinawa sun gabatar wa takwarorinsu ’yan Najeriya tarihin da al’adun bikin, ciki har da tatsuniyar Chang’e da ta tashi zuwa wata, da kuma al’adun kallon wata, kunna fitilu da cin mooncake
Haka kuma, ’yan Najeriya sun ba da labarin yadda ake kallon wata da muhimmancinsa a wasu al’ummomin Najeriya, musamman wajen taruwar iyalai, ba da labarai, waka da nishaɗi.
An kuma gudanar da zaman karatun waƙoƙin Sinanci, inda ma’aikatan Sinawa suka koya wa ’yan Najeriya wasu fitattun baitocin waƙoƙin da suka shafi wata da kewar gida.
Daga bisani, ma’aikatan Sinawa sun raba wa takwarorinsu ’yan Najeriya mooncake, wanda suka bayyana cewa yana wakiltar haɗin kai, cikawa da sake haɗuwar iyalai.
Bikin ya zama wata dama ta ƙara fahimtar juna da ƙarfafa zumunci tsakanin Sinawa da ’yan Najeriya da ke aiki tare a aikin layin dogon.
Masu shirya bikin sun ce za su ci gaba da amfani da bukukuwan gargajiya wajen samar da dama ga ma’aikatan Sinawa da ’yan Najeriya su ƙara musayar al’adu, fahimtar juna da gina kyakkyawar dangantaka.
