Jam’iyyar APC mai mulki ta yi watsi da kiraye-kirayen da ake yi na dawo da tallafin man fetur, tana mai cewa ‘yan Najeriya su yi hattara da ’yan siyasar da ke yin alkawarin mayar da tsarin.
Daraktan Yakin Neman Zaɓen Shugaban Ƙasa na APC na 2027, Sanata Abdulaziz Yari, ya ce duk wani ɗan siyasar da ke yi wa jama’a kamfen da alkawarin dawo da tallafin man fetur yana yaudararsu ne.
Yari ya bayyana hakan ne a ranar Asabar lokacin da mambobin Kwamitin Gudanarwa na Ƙasa na jam’iyyar APC suka kai masa ziyara.
Ya ce dawo da tsarin tallafin man fetur ba abu ne mai sauƙi ba, yana mai cewa ’yan siyasar da ke yin irin wannan alkawari ya kamata ’yan Najeriya su yi taka-tsantsan da su.
Martanin na Yari ya zo ne bayan tsohon Mataimakin Shugaban Ƙasa kuma ɗan takarar shugaban ƙasa na jam’iyyar ADC, Atiku Abubakar, ya sake nanata cewa zai dawo da tallafin man fetur idan aka zaɓe shi shugaban ƙasa a 2027.
Atiku ya ce zai dawo da “targeted subsidy”, wato tallafi na musamman da zai shafi wasu rukunin jama’a, yana mai cewa cire tallafin ya ƙara jefa ‘yan Najeriya cikin matsin rayuwa.
A cewar Atiku, manufarsa ita ce rage tsadar makamashi, dawo da ƙarfin sayen jama’a da kuma rage nauyin da tsadar man fetur ke haifarwa ga farashin sufuri da kayan abinci.
Sai dai APC ta yi watsi da wannan matsaya, tana mai kare matakin da gwamnatin Shugaba Bola Ahmed Tinubu ta ɗauka na cire tallafin man fetur.
Yari ya kuma ce lokacin da yake Shugaban Ƙungiyar Gwamnonin Najeriya, gwamnonin sun sha tambayar NNPC kan ainihin adadin man da ake amfani da shi a kullum, yana mai cewa akwai tambayoyi kan alkaluman da ake amfani da su wajen lissafin tallafin.
Ya ce APC za ta mayar da hankali wajen gabatar da abubuwan da gwamnatin Tinubu ta cimma da kuma shirye-shiryenta a matsayin muhimman abubuwan da za ta yi wa jama’a kamfen da su a zaɓen 2027.
Tambayar da za a yi wa jama’a:
APC ta ce dawo da tallafin man fetur ba zai yiwu ba, yayin da Atiku ya yi alkawarin dawo da shi idan ya lashe zaɓen 2027.
