Kwamitin yaƙin neman zaɓen shugaban ƙasa na jam’iyyar ADC-PCC ya zargi Shugaba Bola Ahmed Tinubu da gaza cika alkawarin samar wa ’yan Najeriya isasshiyar wutar lantarki, wanda ya yi a lokacin yaƙin neman zaɓen 2023.
Daraktan yaɗa labarai da hulɗa da jama’a na majalisar, Kola Ologbondiyan, ne ya bayyana hakan a cikin wata sanarwa da ya fitar, inda ya soki ƙoƙarin kakakin kwamitin yaƙin neman zaɓen APC, Dele Alake, na yin ƙarin bayani kan kalaman Tinubu da ya yi kafin zaɓen 2023.
A cewar Ologbondiyan, Tinubu ya bayyana karara a lokacin cewa bai kamata ’yan Najeriya su sake zaɓensa a wa’adi na biyu ba idan har ya gaza samar da wutar lantarki a wa’adinsa na farko.
ADC-PCC ta ce ’yan Najeriya ba su manta da wannan alƙawari ba, tana mai cewa babu wani ƙarin bayani ko sauya yadda aka gabatar da kalaman da zai iya kawar da alƙawarin daga zukatan jama’a.
Sanarwar ta zargi gwamnatin Tinubu da ƙara kuɗin wutar lantarki maimakon kawo ƙarshen tsarin cajin kuɗin hasashe, inda ta ce hakan ya jefa gidaje da ’yan kasuwa cikin ƙarin matsin tattalin arziki.
Haka kuma, kwamitin ya soki tsarin rarraba masu amfani da wutar lantarki zuwa rukuni-rukuni na Band A, B da C, tana mai cewa masu amfani da wutar na biyan kuɗi masu yawa ba tare da samun ingantaccen lantarki ba.
Ta kuma yi iƙirarin cewa ’yan Najeriya na ci gaba da fuskantar katsewar wutar lantarki, rugujewar babban layin wutar ƙasa akai-akai da kuma ƙarancin samar da lantarki, duk da sanarwar shirye-shiryen gwamnati na inganta ɓangaren.
ADC-PCC ta kuma nuna shakku kan aiwatar da shirin Presidential Metering Initiative, tana mai cewa har yanzu kamfanonin rarraba wutar lantarki na ci gaba da yi wa wasu masu amfani da ita cajin kuɗin hasashe.
Majalisar ta ƙara da cewa ambaton dokar wutar lantarki da shirye-shiryen bayar da lamuni ba su amsa tambayar ko ’yan Najeriya na samun wutar lantarki mai araha da inganci ba.
Ta ce zaɓen da ta ambata na ranar 16 ga Janairu, 2027, zai ba ’yan Najeriya damar tantance yadda gwamnatin ta gudanar da ayyukanta idan aka kwatanta da alkawuran da ta ɗauka.
