’Yan Najeriya huɗu sun lashe zaɓukan muƙaman siyasa a Amurka, yayin da wani ɗan Najeriya ke kan gaba a zaɓen jihar Georgia da aka gudanar ranar 3 ga Nuwamba.
Waɗanda suka yi nasarar sun haɗa da Will Jawando a Maryland da Junior Ezeonu a Texas, waɗanda suka samu kujeru a matakan shugabanci daban-daban.
Sauran sun haɗa da Oye Owolewa, wanda ya lashe zaɓen majalisar birnin Washington DC, da Carol Kazeem, wadda ta sake lashe kujerarta a majalisar dokokin Pennsylvania.
A jihar Georgia kuwa, Segun Adeyina na kan gaba a ƙoƙarinsa na sake lashe kujerarsa a majalisar dokokin jihar, amma har yanzu ba a tabbatar da sakamakon zaɓen ba.
Nasarorin na nuna yadda ’yan asalin Najeriya ke ƙara samun shiga harkokin siyasa da wakilci a Amurka.
