Jam’iyyar ADC ta sanar da cewa za ta ɗaukaka ƙara zuwa Kotun Ƙoli domin ƙalubalantar hukuncin Kotun Ɗaukaka Ƙara da ya shafi zaɓen shugabannin jam’iyyar a matakan unguwa, ƙaramar hukuma da jiha. Jam’iyyar ta ce hukuncin ba ya shafar sahihancin zaɓen fidda gwani da ta gudanar domin zaɓen ƴan takararta na zaɓen 2027.
A cikin wata sanarwa da Sakataren Yaɗa Labarai na ƙasa na jam’iyyar, Bolaji Abdullahi, ya fitar, ADC ta ce ba ta amince da hukuncin ba, tana mai cewa ya saɓa wa doka. Ta bayyana cewa tuni ta fara shirye-shiryen ɗaukaka ƙarar zuwa Kotun Ƙoli, inda take da yaƙinin cewa za a yi mata adalci.
Jam’iyyar ta kuma jaddada cewa hukuncin ya taƙaita ne kan batun tarukan zaɓen shugabannin jam’iyyar, ba wai ya soke zaɓen fidda gwani da aka gudanar ta hanyar zaɓen kai tsaye ba. Saboda haka, ta ce ƴan takararta na matakai daban-daban har yanzu suna nan bisa doka.
Hukuncin Kotun Ɗaukaka Ƙarar ya tabbatar da umarnin wata Babbar Kotun Tarayya da ta hana INEC amincewa da wasu tarukan jam’iyyar da kwamitin riƙo ƙarƙashin jagorancin David Mark ya gudanar. Sai dai ADC ta yi nuni da cewa akwai ra’ayin sabani daga shugaban kwamitin alƙalan da ke goyon bayan matsayinta.
Jam’iyyar ta buƙaci mambobinta da magoya bayanta su kwantar da hankalinsu tare da ci gaba da goyon bayan jam’iyyar, tana mai cewa za ta ci gaba da neman mafita ta hanyar doka yayin da take shirin tunkarar zaɓen 2027.
