Firaministan Isra’ila, Benjamin Netanyahu, ya sanar da naɗin Shmuel Ben Ezra a matsayin sabon shugaban Majalisar Tsaron Ƙasa ta ƙasar, a wani sauyi da ke zuwa a lokacin da ake ci gaba da fuskantar ƙalubalen tsaro da rikicin Gaza.
A cewar sanarwar da ofishin firaministan ya fitar, Ben Ezra zai maye gurbin Tsachi Hanegbi, wanda ya bar muƙaminsa tun watan Oktoban 2025.
Sabon shugaban ya yi fice a fannin tsaro da fasaha, inda rahotanni suka nuna cewa ya taka muhimmiyar rawa wajen haɓaka tsarin kariyar makami mai linzami na Arrow 3, ɗaya daga cikin manyan shirye-shiryen kariyar sararin samaniyar Isra’ila.
Haka kuma, Ben Ezra ya taɓa riƙe manyan muƙamai a Shin Bet, inda ya jagoranci ayyukan fasahar tsaro da kare hare-haren intanet.
Masu sa ido na kallon wannan sauyi a matsayin wani muhimmin mataki da gwamnatin Netanyahu ke ɗauka yayin da ake ci gaba da samun muhawara da sabani kan yadda ake tafiyar da rikicin Gaza da batutuwan tsaron ƙasa.
